En avant-primièra, la companhiá la Rampa TIO (Teatre Interegional Occitan) resèrva la creacion de son espectacle novèl als publics – jove e adulte – de Garona-Nauta. Salvatges se presenta « coma un espectacle ibride, coma un mescladís d’artistes que venon de la dança, del circ, del teatre e de la musica, explica Stella Fontana, cargada de la difusion de la companhiá. Es un encontre inter-cultural a l’entorn de sorgas mediterranèas, de tot çò que las populacions de l’arc mediterranèu poguèron imaginar coma legendas e esperits salvatges dempuèi l’Antiquitat ».
L’umanitat en questions
Aquel projècte d’arts e culturas mesclats regropa en efècte los artistes del Circ Manipulats (Balearas Espanha) e los comedians e musicians del Teatre Baug (Occitania), ambe la Rampa TIO. Occitan, catalan, e francés se mesclan tanben per balhar vida e paraulas a un raconte, « fusion de totas las coneissenças e fèstas popularas transmesas dins los rituals carnavalesques, acompanhat per una reflexion sus l’umanitat e la salvatjariá ». N’en resultan questionaments, sus l’evolucion de l’umanitat, sus la plaça de las bèstias e de l’uman e sus la facultat de destruccion de l’un sus l’autre.
