Dempuèi setembre passat, es una librariá de las nòvas, una vertadièra « cauna » de cultura que valorisa uèi las produccions literarias, cinematograficas e musicalas occitanas, en plen còr de Tolosa. La Tuta d’Oc, vesina de l’Ostal d’Occitania, dobrís grand sos braçes e sos orizonts coma o constata Marion Laignelet, la responsable : « La creacion de la librariá resulta d’un constat menat per l’Institut d’Estudis Occitans de l’inexisténcia d’un lòc dedicat, ambe l’objectiu d’ofrir una varietat de las bèlas de subjèctes que caracterizan la region nòstra e, atal, d’aportar çò que las autras librariás balhan pas. »
Multiplicar los encontres
Un fons de 3 000 referéncias en lenga occitana e/o francesa per totes los atges, e per totes los nivèls de lenga, per afavorir un melhor apròchi de las òbras consacradas als trobadors, a la toponimia, mes tanben als contes e d’autres dialèctes coma lo gascon, lo lengadocian, lo provençal. E Marion Laignelet de completar : « Aimariam afavorir los escambis ambe las escòlas per desvolopar lo gost de la lectura en lenga d’Oc e de l’escritura, mes tanben botar en plaça d’autras palancas ambe las gents e los lòcs, en multiplicant los eveniments e encontres, e pas unicament centrats sus l’occitan. »
